Golwg wahanol ar y gymuned

Diwylliant byw Dinbych, a gafodd ei feithrin dros y canrifoedd, sy’n gyfrifol am ysbryd annibynnol unigryw ein tref – yma byddwch yn derbyn croeso twymgalon a hael a fydd yn gwneud i bob ymwelydd deimlo’n gwbl gartrefol.

Mae Dinbych yn dref gwaith ac mae yma gymuned gelf, theatr a cherdd fywiog – a drefnir yn bennaf gan grwpiau gwirfoddol lleol a mentrau cymdeithasol. Mae llawer o bobl yn trefnu digwyddiadau – ac rydym yn gwahodd pawb i gymryd rhan – o ddarlithoedd y gymdeithas hanesyddol i’r teithiau tywysedig am ddim, nosweithiau ffilm ac arddangosfeydd.

Nid yw datblygiadau’r stryd fawr wedi effeithio rhyw lawer arnom, felly mae Dinbych wedi cadw ei chymeriad ac mae ein busnesau lleol yn cynnig dewis da o siopau annibynnol, caffis, tafarndai a bwytai. Mae rhai o’n busnesau hyd yn oed yn allforio gwasanaethau arbenigol i brosiectau blaenllaw ar draws y byd.

Rydym yn griw creadigol – rydym yn ymdopi â phopeth a ddaw i’n rhan – ac rydym bob amser yn ceisio gwneud y gorau o’r sefyllfa. Ysbyty Gogledd Cymru oedd prif gyflogwr yr ardal am ddegawdau ac roedd yn rhannol gyfrifol am lunio cymeriad goddefgar pobl Ddinbych. Pan gaewyd yr ysbyty yn 1995 fe wnaethom groesawu nifer o’r cleifion i’r gymuned ac maent wedi aros, gan ein hannog i ofalu am eraill a hybu ein hethos cymdogol.

Mae Dinbych wedi bod yn dref farchnad erioed – yn wir, mae gennym orchymyn hanesyddol yn nodi ein hawl i fod yn dref farchnad, felly mewn ymateb i’r penderfyniad i gau’r farchnad da byw, fe wnaethom ddatblygu nifer o farchnadoedd, gwyliau a digwyddiadau sy’n denu ymwelwyr o’r pentrefi cyfagos yn ogystal ag o bell.

Mae Dinbych yn gymuned wirioneddol ddwyieithog lle rydym yn defnyddio’r Gymraeg a’r Saesneg yn gwbl naturiol. Felly dewch i brofi croeso gwirioneddol Gymraeg a Chymreig – cewch groeso cynnes.